城中鏡：項明生奇招影北韓奇景

跨國電子品牌董事兼旅遊家項明生尋日為新作《異色．北韓》搞咗個座談會，大談遊北韓嘅秘聞。佢同二十幾個攝影發燒友組團去，喺七日嘅行程中，導遊有好多限制，佢哋班團友惟有分散導遊嘅注意力，先影到一啲「奇景」，例如影到一張當地人喺電車後邊搭順風車嘅相，而呢個場面好多人都講過，但就冇人影到，所以影到呢個場景當然係好珍貴喇。佢仲話嗰張相係趁導遊去廁所嗰十分鐘影到嘅，導遊事後得悉，即刻就刪除咗張相，仲話喺北韓只可以影靚嘢。咁咪好可惜囉？但佢話好彩返港後用咗啲技術，將嗰張相勾番出嚟，仲擺咗喺本新書入面。