用心聽
黃家和（右）向法國駐港澳總領事栢雅諾呻到當地投資煩到嘔。

法國駐港澳總領事館早前舉行國慶酒會，城中政商界名人齊去捧場，期間仲發生咗件趣事。啱啱收購咗法國酒莊嘅香港餐飲聯業協會會長Simon黃家和，記者以為佢躋身法國酒莊莊主，實好威風啦，點知佢一臉愁容，猛話喺法國做生意難，仲當面向法國駐港澳總領事栢雅諾（Arnaud Barthelemy）投訴添！

用心聽
黃家和（右）向法國駐港澳總領事栢雅諾呻到當地投資煩到嘔。

霍震霆一提起即將出世嘅孫仔就笑不攏嘴。

菱電集團主席胡曉明（右）笑言太太去法國經常荷包大出血。

霍震霆自爆將抱男孫

Simon話早前法國商務部部長來港推廣投資環境，廣邀港商去當地投資，點知原來喺當地開公司都唔容易。佢用咗五個月時間先完成公司登記，然後開銀行戶口又用咗三個幾月，至今仍未搞掂。點解？皆因當地銀行好似驚佢洗黑錢咁，要求攞良民證等證明，做嘢又慢吞吞，好唔積極。佢話相比喺香港開間公司唔使二十四小時就搞掂，法國真係好慢。經此一役，佢忍唔住嘆一句：「始終都係香港好。」當日難得見到栢雅諾，佢梗係要趁機投訴幾句啦，話要等佢哋祖國再做得好啲喎！栢雅諾聽完好重視，仲約Simon搵日再詳細傾。

當日仲見到港協暨奧委會會長霍震霆，佢大仔、香港青年聯會主席霍啟剛即將為霍家增添新成員，問佢諗定送乜嘢禮物畀孫仔？佢識笑唔識答，諗咗幾秒鐘後，賣口乖話：「要孫仔孝順爺爺就真！」咦？呢位霍家第四代傳人，真係男孫嚟喎！

第一手消息請下載on.cc東方互動iPhone/iPad/Android/Windows Phone Apps