「少膽虫，同我入嚟！」呢句咁熟嘅叫聲，少膽虫好耐都無聽過。入到房淫賤黎突然捉住少膽虫隻手話︰「快啲摸吓我個頭。」咁突然嘅舉動，真係嚇到少膽虫面都青埋，「腦細，咁係邊個頭呢？」淫賤黎一身懶腰，抽一抽褲頭，就道︰「叫你摸吓啲頭髮，唔係仲會有咩頭要你摸？」

少膽虫一聽，當堂鬆口氣，「腦細，點解要摸你啲頭髮嘅？」呢句說話，彷彿直插淫賤黎死穴，只見佢一臉激動︰「少膽虫你講！點解？點解我咁靚仔，會被人話『無髮』o架？」的確男人大忌就係寸草不生，少膽虫都即刻摸一摸自己個「乖頭」，好在仲係髮力不減。「少膽虫，仲唔快啲答我？」淫賤黎再次咆哮。

望住淫賤黎個頭，少膽虫心入面諗嘅，只係一片一望無際嘅沙漠，但面對淫賤黎嘅淫威，少膽虫只有忍住並口震震道︰「腦細，係短咗少少！」點知淫賤黎竟然趾高氣揚咁話︰「少膽虫，你識唔識嘢o架？潮流興剷青，我呢啲叫剷青頭呀！」此時此刻，少膽虫真係忍唔住要爆喇︰「咁咪即係青頭仔？！」之後嘅下場，相信有睇開本專欄嘅讀者已經知道，其實都不外乎係「啪啪聲」，或者係「拂拂聲」。但最估唔到嘅係，原來一切都係淫賤黎捉錯用神，人哋唔係話佢「無髮」，而係話佢「無法無天」……

第一手消息請下載on.cc東方互動iPhone/iPad/Android/Windows Phone Apps