政壇：搞搞政：度縮貪曾猛收禮唔益人
設計圖片及對白
本報去年二月獨家揭發「貪曾」前特首曾蔭權爵士貪盡海陸空，歎盡省港澳，之後到臨近離任時，又被本報踢爆佢搬走數以十箱嘅紀念版茅台酒到前任特首辦公室存放，惹來私吞公家茅台酒嘅質疑。不過，有知情人士爆料，貪曾連出外公幹都疑度縮數貪東貪西。
設計圖片及對白
據聞貪曾有次到新加坡外訪，佢已喺當地歎咗肉骨茶，但當佢返到辦公室竟又見到數以十包肉骨茶出現，究竟係佢自掏腰包買入定係有人自動送上門就不得而知喇。不過，最絕嘅係佢有好嘢都唔同人分甘同味，一直放咗喺禮賓府地牢走廊原封不動，直至差唔多過期之時，撞啱有次某政黨同佢食飯，佢先攞出嚟宴客，認真係算死草一名。
勢估唔到佢連水都唔放過，據聞佢試過收過內地著名嘅礦泉水，而且仲係用唧車一板一板送嚟。其實，礦泉水值錢極有限，但貪曾收收埋埋咁多礦泉水，直到過年過節時，先度縮地分番一、兩支畀人，或搞飲宴時供客人享用。咁即係佢寧願唔食唔飲，擺喺度「摳臭」都唔益人喇！
知情人士仲話，貪曾接收內地禮物有一套慣常機制同方法，一般內地送禮者唔會派專人直接將禮物送到禮賓府，反而係只送到深圳皇崗口岸，然後貪曾再搵人到皇崗接收禮物，咁就神不知，鬼不覺，但就要動用政府資源，認真係勞民傷財。如果貪曾在任時將用喺貪方面嘅精力搞好香港，港人就唔使咁閉翳，新政府亦唔使承擔佢遺下嘅蘇州屎喇！
