政壇：黃宜弘享受退休節目多
黃宜弘（左）早前陪太太梁鳳儀飛溫哥華搵靈感寫小說。
立法會前議員「IQ博士」黃宜弘日前被指拖欠前司機年假薪金同獎金八十八萬元，案件將於下月開審。佢尋日出席太太、作家梁鳳儀舉行新書發布會時，IQ博士話好享受退休生活，以前戴太多頂帽好辛苦，所以離開立會後即時放咗六周大假，陪太太去溫哥華搵創作靈感，短短四十日內完成二十萬字著作。佢話依家打下高爾夫球或睇下書、煲碟同跳社交舞，個人冇壓力反而仲瘦咗，皮帶可扣到最入嗰格。
黃宜弘（左）早前陪太太梁鳳儀飛溫哥華搵靈感寫小說。
講到單官司，佢明顯有保留，話現階段唔方便透露太多，因為怕影響審訊，但佢強調唔會和解，皆因佢覺得「講數賠錢等於認輸」。對於司機指摘佢「無情無義」，佢就話自己對個司機已經好好，依家都好擔心對方嘅去向，希望佢快啲搵到工喎。
