政壇：動議乏聽眾 怪醫亂響鐘

事出必有因，怪醫呢兩日之所以甘願留喺立會，係因為大會正討論由佢提出嘅「年度之作」、要求解散醫院管理局嘅動議。查實佢之前已提出過類似動議，但佢依然火氣十足批評醫管局多年不務正業，要求政府索性解散醫管局，啲資源最好跟病人走。

針唔拮到肉唔知痛

過咗一陣，怪醫見議事廳內肯聽佢發表偉論嘅議員唔多，竟然效法泛民主派拉布議員慣常做法，要求主席點算開會法定人數，響鐘Call人開會。怪醫一片好心，但並唔係個個同事都領情，有滿口餅乾嘅建制派議員投訴怪醫阻住佢食茶點，黃定光批評佢「怪醫出怪招」，謝偉俊仲批評「懶蟲竟然響鐘」。

其實，被發現立會出席率包尾後，怪醫辯稱只係出席佢認為重要嘅會議，日前仲話立會只係佢嘅兼職，對被評為立會大懶蟲滿不在乎咁款，但睇佢尋日嘅表現，唔知係咪終於醒覺想洗走懶蟲之名，但好明顯佢係知道對住空氣發言嘅苦況喇。嗱！呢啲咪叫做針唔拮到肉唔知痛囉！

雖然議員都對怪醫嘅動議敬而遠之，但食物及衞生局局長高永文仍不敢怠慢，用足三十二分鐘反駁話醫管局有助提升醫院服務效能，水平深受國際認可。最後原動議同修訂動議都係難逃全軍覆沒之命運，而怪醫亦喺投票後逃之夭夭。