爛果報砌生豬肉 壹淫媒自取其辱

話說法庭有一單官司，已婚三十九歲男子被控與十四歲女網友非法性交，辯方庭上求情指被告努力上進，曾在多間公司任職。問題係爛果報居然借題發揮大做文章，大字標題「曾任報館高層御廚/有婦之夫藉詞慶生攪少女」，再喺內文不斷強調被告「曾任《東方日報》最高層專用廚師」、「服侍最高層人士」，夾硬將一宗普通風化案同東方扯上關係，咁仲唔係指桑罵槐撩是鬥非？咁仲唔係心理變態下流賤格？

一淫做事一淫當，呢單官司好明顯純屬被告個人問題，同佢任職過嘅公司有乜關係呢？更何況被告喺東方只係做咗九個月就轉職，當時仲係○九年，即係四年前咁耐，爛果報間間公司唔揀，一味凸出東方，究竟乜嘢居心呢？最好笑嘅係，案中被告喺東方只係一名普通員工，根本唔係乜嘢御廚，更加同東方最高層大纜都扯唔埋，爛果報亂砌生豬肉，唔通作新聞作到無嘢好作？

唉，來說是非者，便是是非人。爛果報陰濕兼陰毒，想將東方同罪犯拉上關係，其實真正藏污納垢、多次爆出員工犯罪醜聞嘅正正就係爛果報自己。當年任職爛果報突發記者嘅劉江群，為咗搶新聞不擇手段，居然行賂警察通訊員「買料」，結果鋃鐺入獄，成為本港首名因為工作關係行賄罪成嘅新聞從業員。而同屬壹淫媒嘅台灣《壹週刊》更加青出於藍，女記者臧家宜狼到恐嚇勒索台灣首富郭台銘一百萬美元，最終淪為階下囚。壹淫媒玷辱傳媒不知反省，反而賊喊捉賊含血噴人，簡直自取其辱！

講開又講，香港家陣點解咁多風化案呀？點解世風日下人欲橫流呀？咪多得壹淫媒誨淫誨盜敗壞風氣囉。咁多年嚟，壹淫媒累積違反《淫褻及不雅物品管制條例》而被判罪成嘅個案已經超過一百宗，而創刊不久嘅《爽報》淫賤色情周街派更加激起全港鋪天蓋地嘅抵制聲音。所以話，呢單風化案嘅最佳標題應該係：「受壹淫媒荼毒/有婦之夫藉詞慶生攪少女」！

讀者眼睛係雪亮嘅，辦傳媒最緊要做好新聞搞好業績，玩抹黑係無用嘅。壹淫媒經營不善搞到債台高築，居然仲有心情抹黑同行，係都搞掂自己盤數至嚟亂吠啦，吓話！