城中鏡：鍾國斌開班教着衫
鍾國斌衣着打扮入時，吸引民建聯三位新丁議員向佢請教如何着衫。
有「新立會方中信」之稱嘅立法會議員Felix鍾國斌來自紡織及製衣界，揀衫着衫有一手。早前佢就建議同樣係議會新丁嘅EQ葛珮帆買過批衫改形象，嚟緊仲會親自帶佢同漁農界嘅「高佬賢」何俊賢同Ben陳恒鑌齊揀衫，認真唔話得。
鍾國斌衣着打扮入時，吸引民建聯三位新丁議員向佢請教如何着衫。
Felix透露，早排同EQ傾開偈，覺得街板上嘅EQ較古板嚴肅，同佢喺立會見到嘅活潑EQ有出入，於是就提議EQ着多啲可以令佢望落較後生嘅鮮色衫，又建議高佬賢同阿Ben買多幾套時款西裝，等佢哋去到立會開會時，唔使來來去去都係着嗰幾套咁悶同老土。
Felix強調，其實只要識得窿路，唔使好多錢都可以買到名牌靚衫，例如海怡半島附近有棟專賣傢俬嘅工廈，入面其實雲集唔少知名國際品牌嘅特賣場，但由於唔係好多人知，所以啲衫比其他特賣場更平更抵，有時低至兩折就執到心水名牌貨，啱時間會帶埋EQ等上去掃貨喎。
