城中鏡：周國豐搵英女王「看舖」
慢慢揀
本身做律師嘅社交界名人Brandon周國豐，舊年兼做英國及法國床上用品代理生意，仲愈做愈起勁。日前下晝兩點幾見到佢單拖步進中環太子大廈二樓一間精品店購物，店主即上前殷勤款待，雙方傾到雞啄唔斷。一向對英國事物情有獨鍾嘅Brandon，仔細挑選店內貨品，未幾睇中一個連相片嘅相架，相中係英女王人像，佢旋即簽卡付款，滿足地離開。
慢慢揀
扑錘買
有收穫
襯托床上用品店
Brandon話個相架係諗住用嚟放喺佢間床上用品店，粉飾吓陳列室。咁點解要揀英女王人像呢？因為佢間店舖專營英國皇室御用嘅床上用品，用英女王來襯托最適合不過喇。佢透露，個相架連相片，只售一千多元，認真抵買。見佢手挽住一個英國國旗嘅環保袋，佢話每逢去做運動，都會自備環保袋盛載物品。
暑假又到，Brandon話下月中會同太太帶埋兩個囝囝遊日本沖繩四天，享受陽光與海灘。佢話早前經常外出公幹，所以放假唔想去得太遠，近近哋揀咗沖繩，同囝囝游吓水，一齊享受吓家庭樂。
