政壇：搞搞政：擴堆填區行會五小福冇貨交

行會「五小福」率先唔交功課嘅，首推最資深嘅工聯會榮譽會長鄭耀棠，皆因工聯會喺立會嗰六票，一早就硬晒軚話要反對三項撥款，完全無得傾。喺立會只有兩票嘅新民黨，主席葉劉淑儀只有田北辰一票要箍，但最後都係交唔到貨。至於政府最堅實嘅聯盟建仔，今次表現亦好甩轆。雖然佢哋最後力抗黨內屯門區議員嘅反對聲音，企硬支持屯門同打鼓嶺堆填區撥款，但如果佢哋當初唔係為咗選票考慮，表態反對將軍澳撥款，班屯門居民就唔會大呼不公，繼而有樣學樣，大玩包圍立法會同絕食抗議。而且呢啲涉及全港市民利益嘅問題，理應由該黨唯一嘅「超級議員」李慧琼代言，但偏偏身兼行會成員嘅佢，喺今次事件好似失咗蹤咁。

講到最離譜嘅，都係兩個行會成員都搞唔掂一個新界鄉議局主席劉皇發。須知行會內有鄉議局副主席張學明，但佢喺今次爭議中，由頭到尾都唔見影，最離譜係由佢揸fit嘅大埔鄉，居然連同其他二十六個鄉事委員會，一齊聯署登報反對擴建屯門同打鼓嶺堆填區。至於代表經民聯入行會嘅林健鋒，其實大可建議畀發叔豁免投票，經民聯其餘六票繼續撐政府擴建，但佢哋最後居然反過來跟隨發叔「轉軚」，認真無品。睇嚟特首梁振英真係應該趁呢個暑假，好好諗吓點樣改組行會！