政壇：李少光打太極趕走腩肉
李少光（左）同創會主席方黃吉雯齊欣賞武術匯演。
保安局前局長李少光退休後當選為港區全國人大代表，亦係健康快車副主席，日前佢就以呢個身份出席「武林群英匯光明」活動，為內地貧困白內障病人重拾視力籌款。見佢紅光滿面，秘訣全靠佢重拾太極嘅樂趣，所以愈嚟愈年輕。
李少光（左）同創會主席方黃吉雯齊欣賞武術匯演。
原來熱愛打高爾夫球嘅李少光，十多年前曾迷上打太極，仲一直持之以恒，勤力練習，直至做咗保安局局長，因工作太忙，被迫放棄。至近年退休，時間多咗，心情輕鬆咗，決定重拾愛好。耍太極有助養生，好處多不勝數，見佢體格健碩，精神奕奕，身上無半點退休後「豬腩肉」，就知耍太極幫助幾大嘞！
講番個武術匯演，吸引逾百位來自地區嘅武林高手獻技，合共為健康快車籌得一百六十萬元。李少光謙稱唔識武功，未有粉墨登場，但佢最鍾意睇嘅武術係醒獅表演，話夠晒氣勢喎。
