政壇：橄欖友好 遊立會照煲煙

添馬艦新立法會綜合大樓，全座都係非吸煙區，包括擁有無敵海景嘅五樓露天平台，不論係議員、助理、秘書處職員，定係應邀到立會開會或參觀嘅訪客，都一律唔准食煙，但尋日就有人喺五樓平台違規煲煙，事後仲亂掉煙頭，罪加一等。話說立會議員「橄欖」陳鑑林尋日下晝帶咗十幾名訪客參觀立會，當中有深圳海外聯誼會嘅會長同副會長、多名本港同內地商界人士等，有人目擊當中有兩、三人行咗出五樓平台食煙，有人仲煙駁煙唔止食咗一支，事後地下同鄰近花圃，留低咗幾支煙頭，認真無公德心。橄欖就話當時佢的確同班訪客去過五樓咖啡閣，但係就唔見有人行出平台食煙喎。一行成十幾人，橄欖睇漏眼都唔奇嘅，如果見到就應該出聲制止喇！