政壇：怪醫收爐動議被拆骨
設計圖片及對白
今個立法年度就嚟結束，立法會開埋今個禮拜就收爐放暑假，聽日最後一次大會嘅最後兩場議員動議，分別畀醫學界「怪醫」梁家騮同體育文化界議員馬逢國抽到。其中身兼港區全國人大代表馬逢國，就動議辯論斯諾登事件，繼續插爆美國侵犯人權，有口話人無口話自己。至於怪醫就提出「解散醫院管理局」動議，批評醫管局管理不善，浪費公帑云云。不過，怪醫未成功解散到醫管局，就率先畀啲立會同事拆骨，將佢個動議修訂到體無完膚。
設計圖片及對白
夾硬與教資會比較
怪醫尋日同傳媒茶敍介紹佢個動議時，搬出一大堆統計數字力數醫管局對各醫院聯網分配資源不均，要求政府解散醫管局，改為成立類似大學教育資助委員會嘅組織向各間公營醫院分配資源，認為可以慳番唔少公帑，強調醫管局喺一一至一二年度用咗高達十一億元出糧畀總部員工，但教資會就只係用咗三千萬元，佢話：「究竟有冇需要用咁多錢先？」但話說回來，醫管局職能比教資會多好多，怪醫咁樣對比法好似有啲夾硬嚟喎。
佢又重提喺上屆立會都提過類似動議，結果畀其他立會同事改頭換面，變成要求政府向醫管局增撥資源，同佢嘅本意剛好相反。睇番聽日立會個議案，工黨嘅張超雄同白鴿黨嘅「鐵頭仁」何俊仁分別就怪醫嘅動議提出修訂，佢哋不約而同都刪走咗「解散」兩字，改以「檢討」或「改革」代替，最後又係要求政府向醫管局增撥資源，睇嚟怪醫嘅動議都係凶多吉少咯！
