學位僧多粥少 考生壓力爆煲

第二屆中學文憑試聽日放榜，唔使講梗係有人歡喜有人愁，魚躍龍門嘅固然開心，名落孫山嘅必定失落，年年如此。不過今年情況比較特別，一定係開心嘅少，失落嘅多，事關今屆考生超過八萬人，比舊年多一萬，但大學學位仍然只有大約二萬個，考生至少要取得五科共二十一分至可以獲派學位，僧多粥少，門檻更高，你話唔愁就假。

呢，有團體調查發現，文憑試被七成半受訪考生視為「洪水猛獸」，應屆考生平均壓力指數高達六點七分，隨時爆煲。資助學位嚴重不足，好多文憑試考生估計自己入大學嘅機會凍過水，近日紛紛搶報自資院校課程「買保險」，導致今年自資課程報讀數目比去年增加七千個，相當墟冚。

其實，資助學位僧多粥少早就唔係新聞。社會對高等教育需求不斷增加，符合入讀大學資格嘅考生亦連年上升，但大學學位嘅增長似有若無，根本滿足唔到需求，學生唔爭崩頭至奇喇。

係人都知，港府財力雄厚，完全有能力增加資助學位，弊在前朝曾蔭權政府好高騖遠，該做嘅唔做，唔該做嘅就亂嚟，大搞所謂「教育產業」，將教育當生意，將學生當搖錢樹，卒之咪搞出呢個亂七八糟嘅局面囉。

講起香港教育亂象，真係一匹布咁長。嗱，入唔到大學嘅學生，修讀副學士課程本來係一條出路，可惜當局規劃不善，監管不力，副學士課程良莠不齊，長期存在認受性低、學費貴、銜接學位不足等問題。唔少學生畢業後即陷入升學無路、負債纍纍、就業困難嘅處境，唔怪得副學士被譏為「掘頭進士」。

淪為教育亂象犧牲品嘅，仲有報讀毅進課程嘅同學。由於新舊學制轉換，當局將毅進課程入讀條件改為中六畢業生或年滿二十一歲人士，搞到末代中五考生同年齡唔夠嘅同學，統統被拒諸門外，求學無路，你話係咪靠害吖。

教育政策七國咁亂，誤人子弟，現屆政府承諾提升教育水平、擴大及改善大專教育、增加大學學位等，講就好聽嘞，但到依家乜都冇做到，到頭來隨時又係齋噏當秘笈嘅咋，叮！