潮語「低頭族」係指响公共交通工具或街上，只係低住個頭望住自己部手機，不斷打機、WhatsApp、Facebook或微博微信等等等等……總之一上車就拎部手機响度撳撳撳篤篤篤，就算香港小姐行過都睇唔到，地下有張一千蚊紙都完全察覺唔到。

已故歌手陳百強有首歌，歌詞係咁嘅：「地下鐵裏望她……」呢種上學或上班坐地鐵，見到心儀嘅異性，然後偷偷哋望吓，玩眼神接觸後又閃開唔敢望，雖然日日搭同一班車，大家又唔識對方，但又各自心知互通情愫……呢啲咁浪漫嘅情景，恐怕只有三十開外嘅人或上一代人士先識欣賞。今時今日，地下鐵已成為集體回憶，因為都改咗名叫做港鐵。加上依家香港嘅特區政府劣質管治、地產霸權兼夾個人遊侵略之下，已淪為一座悲情城市。港人坐港鐵，仲邊有心情眼睛談情？對眼得閒都用嚟睇住自己對腳有無被個人遊嘅行李篋碌過，又或者垂頭做「低頭族」，望住部手機篤篤篤篤篤……

「低頭族」唔好話唔會同人有眼神接觸交流，有啲仲衰到有大肚婆或阿婆都睇唔到唔讓座。唔好以為淨係後生仔八、九十後先會做「低頭族」，而家有啲上咗年紀嘅大叔大嬸，一樣會低頭望住部智能手機玩Candy Crush或者「推銀仔」，時而傻笑，時而憤怒，可謂今時今日嘅都市奇景。

唔知係咪香港地「低頭族」太多，坐車行街習慣咗低頭，連帶做人被人欺壓都一樣低下頭低聲下氣。就算政府點樣屈機，好多香港人都係沉默「低頭族」。反觀鄰近地區嘅江門市，成千人抬起頭上街反對响鶴山市興建核廢料廠，江門市政府即刻跪低煞停項目。香港有幾十萬人上街，政府依然當你公益金百萬行，如果香港人繼續做「低頭族」，我睇唔到呢個城市仲有咩前途囉！

第一手消息請下載on.cc東方互動iPhone/iPad/Android/Windows Phone Apps