設計圖片及對白

三個堆填區擴建方案搞到民怨四起，終告全軍覆沒。食物及衞生局局長高永文尋日出席一個活動時，卻自動波重提關乎到全港十八區嘅骨灰龕敏感問題，仲話雖然今屆政府遇到唔少困難，但係做嘢唔可以只看眼前，要為未來四至五年着想。堆填區已經搞到政府焦頭爛額，高永文又將火頭燒到骨灰龕，唔驚佢嘅高民望一鋪清袋咩？

設計圖片及對白

高永文尋日出席立法會議員陳恒鑌（Ben）位於葵青嘅議員辦事處開幕後，同記者傾偈，就講到每年香港出生率同死亡率相若，就算大家唔想喺屋企附近見到骨灰龕，呢個累積咗十幾二十年嘅問題始終都要解決，強調今屆政府要努力落實上屆政府嘅建議，喺全港十八區興建骨灰龕。嘩，「貪曾」前特首曾蔭權爵士在任時，隨口噏嘅十八區建骨灰龕嘅建議唔通捲土重來？記得當時唔少區議員強烈反對，質疑政府將責任推卸畀區議會，最後因為批評聲音太大而不了了之。

依家由新一屆政府中民望相對高嘅高永文重提，究竟係試水溫、定係有心燃點另一個火頭呢？從政府喺堆填區之戰嘅表現嚟睇，佢哋一遇反對聲就腳軟，結果先喺將軍澳堆填區輸一仗，最終形成骨牌效應，骨灰龕如果遍及十八區，會唔會演變成另一個更大嘅政治危機呢？

第一手消息請下載on.cc東方互動iPhone/iPad/Android/Windows Phone Apps