政壇：網頁受襲「愛港」報警
愛港之聲唔見咗個facebook專頁，一班成員尋日到旺角警署報案。
愛港之聲尋日到旺角警署報案求助，因為佢哋唔見咗個facebook（fb）專頁，不滿言論自由遭打壓，更懷疑專頁係遭受美國網絡攻擊添！愛港之聲召集人高達斌形容，今次事件係有計劃有組織嘅犯罪行為，所以必須報警，而成員陳廣文就解釋，近月已有四個撐政府嘅專頁因遭檢舉而被停用，相信今次專頁被停用亦不例外。
愛港之聲唔見咗個facebook專頁，一班成員尋日到旺角警署報案。
有愛港之聲成員話，佢哋個專頁試過同一時間有三、四十人要求加入群組，有啲仲係來自世界各地。有成員仲猜測，美國早前表示不滿港府處理斯諾登事件，不排除佢哋群組由有組織敵對分子背後策動破壞喎，有意打壓支持特區施政嘅團體，仲話事件分分鐘涉及外交層面添！咁點解外交事宜又會去警署報案呢？陳廣文話，其實佢哋正向fb了解，但暫未知真正原因，又搵唔到fb喺香港嘅辦公室，只好搵警方幫手。
