政壇：涂謹申借核安全抽水
設計圖片及對白
日本福島核電站洩漏事故令人聞核色變，呢兩日距離香港一百二十公里嘅江門又傳出要興建核燃料處理廠嘅消息，唔少港人都好關注，幸好江門市逾千名市民上街，終於成功扭轉當地市政府嘅計劃。
設計圖片及對白
呢件事發展迅速，喺短短二十四小時已解決，不過，香港政圈依然有人食住條水，白鴿黨嘅涂謹申尋日就話，已去信特首辦表達意見，佢對政府至今冇主動了解江門嘅計劃感到失望。阿涂此說算唔算賊過興兵呢？似乎佢借核安全抽水都慢咗半拍喎！
江門市政府原本有意喺轄下一個鎮興建核燃料處理廠，但呢個龐大計劃嘅民意諮詢期只有十日，結果激到當地逾千名居民前日上街抗議，原本尋日朝早又有抗爭，但江門市政府眼見勢色唔對，寧願早早跪低、平息民憤。相對佢哋嘅快刀斬亂麻，阿涂嘅行動就慢得多喇，喺人哋取消建廠後去信特首辦對特區政府表失望，要求政府以後要主動啲喎。
江門市迅速反應
阿涂話，江門市距離香港並唔遠，如果興建核燃料處理廠，一旦廠房發生任何污染，咁香港同珠三角嘅空氣、水源甚至食物供應都會受影響，香港亦冇可能置身事外。然而，江門市迅速反應，令阿涂追究特區政府嘅行動冇咗焦點，因為佢去函特首辦話，即使係冇任何資料評估，佢都鮮明咁反對計劃。
促向內地索資料
又要求日後內地政府如打算興建任何核燃料加工廠，港府都要第一時間向內地索取資料，做風險評估甚至做公開諮詢喎。呢啲要求講就容易，落實卻有唔少問題，甚至可能牴觸粵港聯席會議嘅操作，阿涂冇理由唔知噃？
