其身不正燒後欄 消防官僚現眼報

話說位於尖東嘅消防處總部大樓尋日早上突然警鐘大作，今次唔係警鐘壞，亦唔係演習，真係發生火警，原來係十樓伺服器房嘅光管火牛懷疑過熱冒煙而出事。根據消防處自己所講，係光管嘅變壓器冒出少量煙霧，觸發房間內一個煙霧偵察器，繼而啟動自動火警警報系統喎。結果大樓內幾百名職員包括多名消防高官要匆忙逃生，有名女職員仲報稱不適，都唔知幾狼狽。

係人都知，伺服器房係消防處嘅「心臟」，萬一毀於祝融，指揮系統隨時跪低，後果不堪設想o架。最諷刺嘅係，消防處日前以接獲一封電郵投訴為由，指東方報業中心伺服器房灑水系統有問題，高調派人上門滋擾，最後證實投訴純屬子虛烏有，一無所獲。依家先至搞清楚，原來伺服器房有問題嘅唔係報館，而係消防處，呢啲咪叫現眼報囉。

消防官僚平時扮晒嘢，要求市民提高警覺，注意防火，其實最冇防火意識嘅就係佢哋自己。好簡單，如果平時注意維修保養，光管火牛又點會無端端冒煙吖？消防處聲稱總部大樓上個禮拜六至進行過消防裝置檢查，但幾日之後就發生火警，究竟係真檢查，定係敷衍了事吖？見微知著，消防處做嘢幾咁求其幾咁兒戲，已不言而喻。講到尾，消防官僚其身不正，有口話人，冇口話自己，唔出事至奇喇！

最匪夷所思嘅係，今次只係發生一級輕微小火，消防處居然出動八架消防車、近五十名消防員撲救，唔知嘅仲以為係發生四級大火添。喂，一級火警啫，使唔使咁大陣仗吖？唔通消防員多到冇嘢做？該處仲聲稱咁嘅安排符合既定程序喎，其實根本就係狡辯，一場小火出動近半百人，講得好聽啲叫保護自己，講得難聽啲係浪費人力。

消防處應做唔做，唔應做就亂嚟，大家都見怪不怪嘅喇，好似搞水運會咁，都唔知幾咁積極，出動幾多人手。正如有人話齋，如果佢哋平時做嘢都係咁勤力，香港就唔會搞到安全隱患多多，危機四伏喇。所以話，消防官僚敷衍塞責，後果可以好嚴重，今次消防總部發生小火只係一個警告咋，如果佢哋繼續不務正業，日後可能仲大鑊吖，叮！