SUN奇古怪：Sun潮語：【毒舌】
潮語 「毒舌」一睇就知係同歹毒有關，個「舌」即係舌頭，有毒嘅舌頭當然係唔慌好嘢。 「毒舌」係指一啲人經常喺網上發表一啲好尖酸刻薄，甚至郁啲就咒罵人祖宗十八代嘅狠毒言論。呢啲言論有時係冷嘲熱諷，有時係人身攻擊，甚至連人哋家爺仔乸都唔放過。 有啲「毒舌」係專業網上五毛，有啲係毒男憤青，亦有啲終日覺得個世界欠咗佢，或成日想人死嘅心理不平衡嘅人。當然亦有啲係因為失戀，而不斷「毒舌」前度或情敵。
有人話每年七一遊行都係行禮如儀，無論有幾多人上街，最後都係行完就算，集體返歸歎冷氣，然後下年再行過。上街嘅訴求，政府例牌都係嗰幾句回應，民陣搞完之後又唔會跟進，結果大家各自當無件事，谷氣嘅市民繼續谷氣，無能嘅政府繼續無能。今年終於有人唔想行完就算，有組織於七一遊行之後，喺遮打花園發起絕食行動，爭取落實真普選。參與絕食行動嘅仲包括人民力量立法會議員陳志全，佢由七一開始絕食前後超過200小時，直至七月十一日特首出席立法會答問大會為止。佢仲喺立法會提問，之後暈倒送院。好多人對佢嘅絕食行動不以為然，有網民更覺得呢啲行動無用，涼薄嘅說話不絕於耳，有啲網民甚至歹毒到留言叫陳議員一路好走，呢啲網上「毒舌黨」難道唔怕有報應嗎?
根據網上資料，「毒舌」係日文漢字，本來係中國古語，中國後來就無用呢個詞語，但日本就保留咗嚟用。「毒舌」最初係出現喺日本動漫或電腦遊戲裏面，後來有網民借咗嚟用，久而久之就成為咗潮語，喺華文世界都通用。 「毒舌」行為喺網上討論區好常見，到底呢啲係一種發洩定真係詛咒就不得而知。不過，「毒舌」始終都係作孽嘅行為，咒人死咒人呢樣嗰樣最終可能自己受番。同啲「毒舌」接吻打車輪未必真係會中毒，但「毒舌」咁口臭你都夠膽咀埋去，後果就請自負。
