政壇：搞搞政：「水蓋」分唔勻 發叔帶隊抗爭？

有政界中人透露，鄉議局大部分鄉紳喺舊年特首選舉本來力撐前政務司司長唐唐，而支持嘅其中一個原因，傳聞係有關方面承諾班鄉紳會獲授勳。但自選舉大勢轉向ＣＹ梁振英後，鄉紳亦被迫轉軚。而喺ＣＹ當選後，原本由發叔擔任嘅行政會議成員一職，改由副主席張學明擔任。發叔決定反對擴建屯門堆填區係咪同冇得做行會有關，咁就唔知喇，但佢決定反對嘅時間，咁啱喺本月初政府授勳後發生。

每年政府授勳前夕，政府總會向各界人士攞提名名單，再從中篩選。據聞政府今年依舊問發叔攞名單，而發叔提交嘅名單就同一年前支持唐唐時嘅名單一模一樣，但結果只有兩名鄉紳分別攞到銅紫荊星章同太平紳士，名單內其他人無晒影。

據聞呢件事除令發叔冇面外，仲令一班新界東、西嘅鄉紳對政府大為不滿，感覺好似「打完齋就唔要和尚」。咁啱得咁蹺，喺七一授勳之後，發叔突然高調反對擴建屯門堆填區，一聲號令就獲各鄉響應絕食行動，連本來對堆填區冇乜所謂嘅打鼓嶺鄉都加入抗爭。