政壇：戴耀廷壞車要學生夾錢整？
戴耀廷去協恩中學演講，被傳壞車要學生夾四千元維修。（資料圖片）
「佔領中環」發起人之一嘅港大法律學者戴耀廷，日前去協恩中學演講搞到滿城風雨，被人話鼓吹學生做違法活動。事後有家長報料，話近日協恩中學副校長喺早會上同學生講，戴耀廷演講當日，其座駕開往學校途中突然出現故障，要求學生每人夾四元，集資四千元用作維修費，家長質疑點解學校需要承擔費用，仲要學生分擔？
戴耀廷去協恩中學演講，被傳壞車要學生夾四千元維修。（資料圖片）
我哋問番協恩公關，原來成件事係當日演講結束後，有老師為咗幫戴耀廷安全離開，捱義氣用自己部車護送佢離開，點知突然爆胎，老師最終自掏荷包四千元維修。當時副校長亦喺車上，事後喺早會分享事件，講笑話我哋有一千個學生，一人夾四元就得喇！
副校長同學生講笑，點知學生就好認真，聽公關講，有兩個中一學生尋日仲好認真咁畀咗四元校長，校長見到梗係覺得好笑啦！講到尾最無辜係戴耀廷，原來佢對成件事毫不知情，我哋問佢回應時先知道，話可能係送完佢回程時先至爆胎。
