政壇：嚴人寬己議員又露底
設計圖片及對白
立法會議員成日都係有口話人冇口話自己，最叻包庇自己友，一有高官被揭漏報利益，班議員又話要譴責，又話要下台，但白鴿黨議員「鐵頭仁」何俊仁被本報揭發漏報公司股份利益，立會查完一輪之後就又係放生了事。近日本報踢爆新民主同盟議員范國威同立會前議員鄭家富濫用立會停車場車位，多名泛民主派議員又講到好似好小事咁，企圖淡化事件。
設計圖片及對白
最近立會再被揭一單明顯嚴人寬己嘅事件，原來各政府部門奉行咗十幾年嘅《公開資料守則》，並唔適用於獨立於政府嘅立會秘書處，但多年來都冇人發現同跟進，包括某啲成日狠批政府無按守則向市民公開資料嘅議員。直至早前行政管理委員會討論相關問題，先至有人提出秘書處係咪要整番套類似嘅政策補鑊，以免招人口實，但亦有人死撐秘書處大部分資料都已經放晒上網，透明度比好多有守則規管嘅政府部門高好多，係咪有需要整色整水又搞多套嘢喎！
陳維安把唔好關？
話說回頭，呢個問題唔通連秘書長陳維安都唔知？若果係嘅話，咁就抵打囉！咁點補鑊先？
據聞，爭拗咗一輪之後，立會終於喺尋日透過政府新聞處發新聞稿，宣布將會制訂政策公開秘書處保管嘅資料同檔案畀公眾查閱，並就有關政策諮詢公眾兩個月，市民可以自行上網瀏覽有關諮詢文件，喺今年九月十一日或之前提交意見。唉！做嘢又係慢幾拍，但係都好過乜都冇做嘅。
再講，班議員過往亦經常批評政府，專等立會暑假休會時先展開公眾諮詢，依家秘書處本身又係咁做，真係五十步笑百步。
