鄭家富瘀爆收場 立法會其身不正

老實講吖，鄭家富生人霸死地，唔到佢唔認衰。呢，佢咪聲稱係新民主同盟議員范國威義務法律顧問，所以享用職員泊車證嘅，但本報查詢過立法會秘書處，講明泊車位只供議員、秘書處部門主管，以及議員同秘書處嘅訪客使用，其中訪客車位仲需預訂添。事實勝於雄辯，鄭家富滿口謊言車天車地，簡直唔衰攞嚟衰。

錯就要認，打就要企定。鄭家富霸車位證據確鑿，范國威涉嫌利益輸送無可抵賴，再狡辯盞愈描愈黑嘅咋。立法會車位屬於公共資源，過氣政客長期佔用，仲係兩個位咁多，一來涉及濫用公帑，二來涉及利益輸送，除咗立法會有必要跟進之外，審計署同廉政公署係咪亦應該介入調查呢？你知啦，官商勾結利益輸送呢家嘢已經搞到香港烏煙瘴氣，如果連立法會議員都目無法紀私相授受，行政立法一家貪，香港真係死得o架喇！

講到呢度，太一叮不得不提出一個問題，立法會停車場係議會重地，點解會淪為無掩雞籠，任人佔用呢？嗱，蒼蠅不叮無縫嘅蛋，發生今次醜聞固然因為政客醜陋，貪婪成性啦，不過歸根究柢咯喎，問題始終出喺立法會身上囉。老實講，如果立法會停車場唔係管理混亂，無規無矩，就算鄭家富再貪婪，范國威再蠱惑，都無辦法私相授受假公濟私啦！

本來呢，立法會停車場已安裝咗一個停車系統，用作登記出入嘅車輛，防止「超泊」，偏偏尊貴嘅議員們以系統不方便等諸多藉口要求停用，咁即係擺明為偷雞超泊鋪路啫。其身不正，何以正人，政客視法紀如無物，管理一個停車場都搞到一塌糊塗，仲有乜資格監督港府呀？唔怪得立法會畀人形容為垃圾會啦！

所以話，香港沉淪唔係無理由o架。政客醜陋，天下烏鴉一樣黑，鄭家富固然虛偽無恥，其他政客一樣寬己嚴人，自私自利，咁搞法，香港點會好吖。呢，雖然鄭家富已駛走兩部車，但本報記者發現，尋日仍有議員超泊，真係死性不改，問你服未。

咁啦，立法會如果唔想再做垃圾會，快快撥亂反正，一來認真檢討停車系統，二來嚴肅處理鄭家富霸佔車位事件，千祈唔好又玩包庇吖，叮！