城中鏡：張華峰睇煞科唔開會

跑馬地前晚舉行煞科賽，黃昏七點鐘見到立法會金融服務界議員張華峰喺馬匹亮相圈嘅投注區出現，期間佢凝視電視屏幕，又不時同路過嘅好友打招呼傾兩句。不過，當時正開緊立會大會，點解佢會在場呢？加上佢早前講過自己作為新丁議員，逢周三夜馬寧願留喺立會開會，亦唔敢入場為愛駒打氣，難怪佢叫人當睇佢唔到喇！其實前晚立會討論廢物回收如何製造就業機會，議題似乎唔係好關佢個界別事，加上話晒都係馬季煞科日，抽少少時間去湊吓熱鬧都唔係好過分嘅！