SUN搞作:打橫嚟講:死而不僵害香港學童
自去年,中學生組織「學民思潮」反國教洗腦教育一役,將香港廢柴政府內廢中之廢的吳得掂教育局長打得挾尾而逃,煞停洗腦教育,及撤回那份含毒量極高的偏頗國情教材之外,香港政府更聲稱不再資助那消耗港人公帑的親共集團之「國民教育服務中心」。
點知,早前,教育局又鬼鬼祟祟的話準備接受該含毒中心續命延期,幸得被全港市民鬧爆,才跪低掃把趕走該中心申請。
當大家以為呢個廢柴政府會識死,知所進退,重入正軌,唔好再出陰招,禍害香港學生啦!殊不知,原來奸計陰魂未散;家陣,好多學校仲有一本,名為《香港基本法小學生簡易讀本》嘅垃圾,廣派畀同學仔,內文話「港人治港下,司法、行政和立法機構嘅互相配合,是為重要」喎!咁都仲未PK,更指「行政長官的法律地位高於行政、立法、司法三個機構」,咁即係話佢至係大佬,全部人都要聽佢點?
呢本垃圾《讀本》係由一間叫做「香港基本法推介聯席會議」嘅組織向香港政府擸咗數十萬元印製出版的,該會主席兼本書作者黃富榮出書後一年,獲頒銅紫荊星章,不過,唔知佢個腦生喺邊,香港行政長官只是一名服務港人的「公僕」,而非專權獨裁的大佬,《基本法》亦無指明三權配合的。全世界都知這三權互相制衡,乃才係最佳的管治機制!
垃圾《讀本》內又話「管理香港的人必須愛國愛港,這是最基本的要求」,《基本法》哪段有咁寫呢?我哋只聽過大陸佬咁膠噏過咗喎!
在此要問:一班飲香港水大的賤精醒目仔,着數你哋搵夠啦!唔好再害我們的下一代,好唔好呢?因住收尾嗰兩年呀!
彭志銘
次文化考古學家,對城中潮語有深入研究,博徵博引,廢官廢人行埋一邊。
歡迎add我facebook一齊(目及)實政府