林健鋒話粉嶺高球場好處多籮籮，其他高球場相形見拙。

因為新界東北發展計劃令粉嶺高爾夫球場爭議升溫，繼立法會議員梁君彥開腔力撐高球場有存在必要後，同樣擁有會籍嘅林健鋒前日亦接力，大讚粉嶺高球場面積大之餘，地勢又平坦，其他高球場真係無得比。

林健鋒話粉嶺高球場好處多籮籮，其他高球場相形見拙。

林健鋒同時擁有石澳同滘西洲高爾夫球場會籍，但佢同其他朋友都極少光顧，皆因石澳場地有時會忽然大風，打出嘅高爾夫球唔知吹咗去邊，搞到佢唔可以一桿入洞。滘西洲高球場雖然收費較平，但就略嫌位置太過偏僻。反而粉嶺高球場鄰近市中心，加上會員可於周六、日優先使用高球場，所以佢一個月會去打兩至三次波。

佢話入粉嶺高球場打波唔係有錢人嘅專利，任何市民只要早一日打電話預約兼肯畀千幾蚊入場費，就可由朝早七點半打到天黑先走。佢又話粉嶺高球場陪伴唔少高球發燒友成長，因為一八九八年亞洲首場高爾夫球賽就係喺粉嶺高球場舉行，所以如果政府要收番笪地起樓，一定會摧毀唔少人嘅集體回憶喎！

第一手消息請下載on.cc東方互動iPhone/iPad/Android/Windows Phone Apps