政壇：貪曾簽爛紙 政改兒戲
政改諮詢未展開，有人已磨拳擦掌提方案，但最終要喺立法會數夠票通過，先至最費工夫。有人諗起舊年立法會實施嘅選舉方案，喺一○年談判時有部分情節都幾驚險，原來方案事成前有部分過程要簽字作實，目的係令各方都不得反悔。
舊年實施嘅選舉方法，最重要係加咗五席區議會功能界別，即係超級區議會議席。相信大家都仲記得，談判過程係架空咗「貪曾」前特首曾蔭權爵士嘅政府同左派人士，方案取得共識之後，至交由特區政府執行。
由於政府同泛民主派之間嘅互信非常薄弱，貪曾要白紙黑字向白鴿黨保證，超級議席提名門檻只能喺十人至二十人之間，而該黨就要拎住呢張紙，交去黨中央討論及通過。
白鴿黨決定支持超級區議會議席方案後，特首辦同樣要求該黨簽字作實。特首辦但求心安，即使對方用爛紙一張寫低決定及簽名作實，都肯接受。
究竟用一張爛紙「作實」嘅聲明有冇法律效力？有人反悔時，呢啲聲明又有乜效用？呢啲鮮為人知嘅情節只反映一件事，就係彼此冇互信，就算喺爛紙上簽個名，都算係一種保障。
