政壇：董吳玲玲帶孫出埠抖暑
董吳玲玲（中）愛駒勝出，莊哲猛（左一）、姚本輝（左二）同沈墨寧夫婦（右一、二）齊飲杯慶祝。
前晚快活谷馬場上演今季煞科賽，咁啱福建社團聯會副主席兼帝皇翡翠行政總裁董吳玲玲有兩匹愛駒出賽，贏馬信心倍增，董太仲請埋一班老友入場玩，結果往績唔錯嘅「翡翠明星」不負眾望，太熱勝出，近四十萬元獎金袋袋平安，亦帶挈眾老友贏唔少，為今個馬季畫上完美句號。
董吳玲玲（中）愛駒勝出，莊哲猛（左一）、姚本輝（左二）同沈墨寧夫婦（右一、二）齊飲杯慶祝。
當晚座上有位稀客，就係前全國政協常委楊孫西囝囝楊華勇嘅外父莊哲猛。董太話佢哋都係福建人，相識多年好投契。莊哲猛態度好和善，佢笑稱移居香港二十幾年，廣東話仍然識聽唔識講。自從五個幾月前，華勇同太太莊菲娜誕下囡囡後，莊哲猛同太太就好恨湊孫，經常三、兩日就去探外孫女。佢笑稱，依家享受弄孫之樂，地產同珠寶生意已漸交畀拍檔同細女幫手打理。
董太丈夫董中浩、大仔董必成同細仔董必政亦齊現身，仲有練馬師姚本輝、經營陀飛輪生意嘅沈墨寧夫婦等人。董太話放暑假期間係佢間印刷廠趕貨嘅旺季，但幾忙都要抖吓，正計劃同老公帶三歲孫女Molly出埠，過個開心暑假。
