政壇：環局漠視立會新丁
設計圖片及對白
冇乜人識嘅立法會新丁議員經過近一年喺議會不斷發言同接受訪問，知名度亦應大為提升，但近日政府提交上立會討論嘅擴建堆填區建議，竟牽起一件鮮為人知嘅事件。
設計圖片及對白
話說自政府將擴建三個堆填區嘅建議交上立會審議時，記者開始搵各黨派有關負責人發言，估計吓大家嘅投票意向。當大家問到白鴿黨時，好自然就搵主席劉慧卿，而問工聯會就搵陳婉嫻，但佢哋竟然都唔係負責環保議題，問清楚先知兩黨環境發言人原來分別係胡志偉同郭偉強。
與此同時，我哋又聽聞環境局局長黃錦星同副局長陸恭蕙亦曾邀約白鴿黨及工聯會議員會面，傾堆填區問題。但佢哋講明唔見白鴿黨嘅環境政策發言人，只係要見卿姐。至於約見工聯會嘅時候，就同有關人士話：「你哋工會邊個話事o架？」完全漠視佢哋嘅存在，據講郭偉強對此好不滿。
老實講，話晒卿姐同嫻姐都係阿姐級，所以大家都覺得佢哋把聲大啲之餘，仲清楚本身政團嘅立場。相比胡志偉同郭偉強，佢哋分別係九龍東直選議員同勞工界議員，似乎同堆填區毫無關係，咁又難怪大家唔搵佢哋嘅。不過面對堆填區呢啲議題，正係代表各黨嘅環境政策發言人發功嘅時候，睇嚟兩位要加把勁喇！
建仔內部倒「葛」
之不過，幫到政府過關嘅都唔好過。聽聞無論係政府內部或建仔都覺得，經常高舉環保旗幟嘅建仔新界東議員EQ葛珮帆係搞禍擴建堆填區嘅罪魁禍首，事關如果當初EQ肯蝕底啲硬啃支持將軍澳堆填區當然最好，就算唔支持都唔好叫政府撤回，寧願三個堆填區齊齊闖關，咁將軍澳堆填區即使被否決，屯門同打鼓嶺居民都無咁大怨氣，兩個堆填區自然順利通過。事到如今，擴建堆填區一役搞到建仔兩面不是人，據聞該黨內部仲湧現一股倒「葛」聲音，今次EQ真係唔知點收科喇！不過，EQ尋晚就喺社交網站貼出該黨支持擴建屯門同打鼓嶺堆填區嘅聲明，唔知係咪想補鑊呢？
