消防宿舍亂象多 其身不正嘆奈何

呢，消防處早前聲稱收到一封電郵投訴，短短四日已經踩上報館「檢查」，結果一無所獲。相反，本報三年前曾經揭發消防處知法犯法，消防宿舍嘅走火通道嚴重阻塞，亂象叢生，時至今日，唔知情況有冇改善到呢？

　講起真係把鬼火。本報記者重訪多個消防宿舍，發現防煙門依舊「門常開」，冷氣架變成晾衫架，走火通道一係變成種花植樹嘅後花園，一係變成收藏雜物嘅儲物室，堆積大量鞋櫃、雜物櫃、單車、雨傘、木板、木梯、紙箱、BB車等，應有盡有，將原本五呎闊嘅走火通道逼到得番兩呎，住戶出入步步為營，幾乎搞到好似劉翔玩跨欄咁，萬一發生火警，後果不堪設想。

仲有呀，雖然消防宿舍規定唔准養狗，但市民踢爆，該處宿舍養狗情況非常普遍，經常見到消防員帶狗出宿舍散步，唔止滋擾附近居民，甚至試過咬傷人添，擺明無視法紀，當規例無到。

唉，紀律部隊唔自律，執法部門反而犯法，你話係咪諷刺吖。正如古人話齋，其身正，不令而行，其身不正，雖令不從。消防官僚有口話人，冇口話自己，執法雙重標準，唔怪得本港消防安全漏洞多多，危機四伏，求其一場火警，都隨時死傷枕藉喇。

有立法會議員批評，消防處旗下宿舍完全無王管，知法犯法嘅行為令人驚訝，而身為執法部門竟然可以咁放縱，更加暴露政府部門官官相衞嘅陋習。有區議員更加一語中的，消防宿舍帶頭唔守消防法例，情況多年來毫無改善，而且愈來愈嚴重，消防處連清理宿舍走火通道雜物咁簡單嘅事都做唔到，證明佢哋識管人唔識管自己。

可惜吖，對於消防官僚來講，呢啲批評根本係對牛彈琴。呢，本報查詢之下，佢哋依然知錯不改，死撐所有宿舍都冇問題喎。堂堂執法部門擘大眼講大話，真係令人嘆為觀止。話時話，如果有人電郵投訴消防宿舍安全有問題，唔知消防處會唔會高調派人上門檢查呢？

消防員知法犯法，消防處應管唔管，太一叮忠告處長陳楚鑫，唔好再掛住滋擾傳媒打壓新聞自由喇，快啲用鏡照下自己，做好內部管理先喇。須知道，祝融冇眼，萬一亂象叢生嘅消防宿舍發生火警，能救不自救，咁就唔係笑話咁簡單喇，叮！