我寫包單敢講，今日，住喺香港的精神正常人，沒有一個會知道香港仲要衰幾耐？仲會衰成點？

有人估得到的！我切！

淨係睇到香港政府繼續當全世界啲人係白癡，繼續鍾意肆無忌憚咁講大話，繼續以為可以呃到中央，繼續不自滿地亂港禍國，但卻又唔死喎！荒謬極致！

香港廢柴政府為擴建垃圾堆填區這麼小事，辣慶各區新界人不特止，仲搞到親政府的保皇黨內訌，這是六七暴動後幾十年來，從沒發生過的內部矛盾，今屆廢柴政府居然能做得到，真神武！

當鄉議局主席發叔也聯同死敵民主派同政府反枱，兼不惜處男拉布去保衞家園，不准垃圾沾污屯門時，香港高層突然轉口風，話本星期五的撥款申請，唔係用嚟擴建堆填區的，只係用嚟做研究嗰喎！

唉！咁卑劣嘅大話都講得出，真唔怕畀雷劈呀？那個真真正正嘅《前期工程研究》在二○一○年已經做完了！今天若有傻仔被老點誤導贊同撥款，即贊成擴建計劃，並得馬上進行，展開第二期開工程序也！這不特止是個語言陷阱，還是個行騙陰謀。最得人驚者，當眾說謊言呃市民的策劃者，是政府高層大話精，若又一次讓無誠信的騙子過骨，下一代啲細路便不會再重視誠信道德，呢度又點會好？有錢而無人格，只是一隻畜牲而已！

梁特首昨天話：「厭惡性的固體廢物，一定造成滋擾……每個香港人應身體力行，幫社會減少垃圾輸出……」對呀！請給香港一個普選機會，便可源頭減廢囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps