「虫虫,咪嬲啦!最多我錫番啦!啜~~」淫賤黎如此對少膽虫說。「嗱!最多我同你一齊分享潮偉啦~~」一心想喺公司發番場春夢等收工嘅少膽虫,當堂嚇醒。「搞乜鬼?唔通我同淫賤黎都有異於常人嘅因子?」少膽虫心諗。

正值苦惱間,淫賤黎卻喺遠處恭恭敬敬迎來一位墨鏡男,只見那墨鏡男趾高氣揚咁步進淫賤黎間房,淫賤黎緊隨,仲喺入去之前再探出個肥頭望望,驚住畀人發現咁。少膽虫個心跳一跳,借頭借路去到間房門口偷聽……

「王大導演,我係唔係真係可以同潮偉同床表演?」淫賤黎好殷切,爭啲要跪低咁款。「咁又唔係話唔得,不過要拍得靚之餘,票房唔可以太高……」「得得得!」淫賤黎搶住答:「我做親嘅嘢都無人睇,一定無問題!」王大導演回話:「唔係吖,你自編自導嗰齣七一前套好戲《壹門弄斧》都好多人睇呀,劇情支離破碎得嚟又實際上無事發生,好啱我口味。」淫賤黎遇知音,好開心,就捉實王大導隻手講:「大家口味都咁重,真係難得!幾時開鏡?使唔使露股……」

少膽虫唔知點解,可能夾雜被出賣與失寵種種感覺,聽到一肚火,衝入去大叫:「淫賤黎你好嘢!你呢個負心漢!」總之,淫賤黎即刻辯解:「唔係呀,我諗住搵王大導幫手,合理化『動呻吟』啲鹽花,睇落文藝啲啫!」「我唔聽呀!我唔聽呀!」少膽虫奪門而出,嗰一刻,少膽虫好想喊。事後諗起都唔係好知點解咁講,可能真係人人心入面都有座斷背山啦。

第一手消息請下載on.cc東方互動iPhone/iPad/Android/Windows Phone Apps