政壇：搞搞政：發叔硬抗政府有後着？
設計圖片及對白
堆填區之火愈燒愈旺，隨着鄉議局主席劉皇發及經民聯嘅表態，屯門堆填區撥款被否決嘅結局幾定，年近七十七歲嘅發叔近日忽然同政府撐到行，仲成個屯門捍衞者咁，以「我係屯門人」維護本區利益。有鄉紳透露，發叔想喺鄉議局嘅餘下兩年任期搏到盡，爭取最大利益。
設計圖片及對白
今屆鄉議局任期將會喺二○一五年初結束，領導層執位傳聞已經滿天飛，發叔之退據說或令鄉議局立立亂，有傳屬於大埔約並擔任鄉議局副主席多年嘅行政會議成員張學明，好大機會問鼎下屆主席寶座。至於另一副主席林偉強亦好大機會跟隨發叔一齊退落嚟，加上張學明「升呢」後嘅副主席空缺，兩個副主席位將會成為元朗約及南約之爭，
地區鄉事組織嘅競逐，爭上位嘅人深信仍有賴發叔支持，或者係咁，發叔呢幾日表明反對擴建屯門堆填區後，各村各鄉就一呼百應咁表示反對喇。聽聞發叔喺呢件事嘅立場企得好硬，皆因佢要喺卸任前爭取最大利益，但唔知係咪為咗原居民嘅利益呢？
