前商務及經濟發展局局長馬時亨(肥亨)離開政府已經五年,新一屆政府上咗任都一年啦,但有報道翻炒政府高官過去六年嘅收禮記錄,指佢任內收受兩條珍珠頸鏈,但冇交代頸鏈價值同去向,有「落格」之嫌,激到肥亨生蝦咁跳,大呼冤枉。

肥亨尋日出席活動,撞啱立法會議員劉慧卿同行政會議成員羅范椒芬,三人即刻肉緊合照,劉慧卿仲打趣話今次行政、立法機關罕有合照,再加埋「疑似港鐵主席」就最好喇!肥亨日前獲港鐵委任為非執董,本身已經係好多間上市公司非執董嘅佢,仲盛傳有機會接替錢果豐做港鐵主席,更上一層樓。

但聲譽對肥亨嚟講先係最重要,佢喺活動上主動向我哋呻,指○八年的確獲江西省同湖南省政府送禮,分別係一條淡水珍珠頸鏈連胸針同洞庭珍珠頸鏈,但兩條頸鏈都只係值四百元,啱啱好冇超出守則准許上限可以作個人保留。

不過,肥亨為怕麻煩,最後都將佢哋捐出嚟畀同事作抽獎用。總之就係兩條頸鏈都係意思意思,唔係乜嘢名貴首飾,況且佢最後都無據為己有,所以大呼冤枉。

第一手消息請下載on.cc東方互動iPhone/iPad/Android/Windows Phone Apps