政壇：建仔切蛋糕冧檔真肉酸
建仔徽號幾乎跌落嚟，林鄭（右二）即時扶住。
生日食蛋糕，本嚟係寓意彈得高嘅吉祥事，但民建聯尋日慶祝成立二十一周年酒會，並循例切蛋糕慶祝，卻搞出招牌冧檔嘅唔老利下場。該黨主席譚sir譚耀宗切蛋糕不慎，搞到插喺蛋糕上嘅建仔徽號標誌歪向一邊，更有向下墜之勢，出席酒會嘅政務司司長林鄭月娥見狀，即刻出手托住，先免咗建仔陷入更大尷尬中。
建仔徽號幾乎跌落嚟，林鄭（右二）即時扶住。
其實，建仔近排真係諸事不順，更被人批評經常跪低撐政府。唔知係咪衰開有條路，酒會都搞單咁嘅烏龍，唔知譚sir會點諗？人哋食蛋糕寓意係愈彈愈高，建仔食蛋糕又唔彈又唔高，仲要靠人打救，真係肉酸。
該黨元老曾鈺成尋日幫口打圓場話：「民建聯最叻係跌低咗起番身！」呢句說話其實可圈可點，因為跌低嘅原因可以有好多種，有時係意外失足，有時係腰骨軟「跪低」，亦有時係根本伸唔直腰、點起番身呢？建仔中人或者應該研究吓今次切蛋糕意外嘅潛在訊號，反思吓點解人哋愈彈愈高，佢就彈到跪低呢？
