政壇：梁君彥死撐高球消費平
梁君彥表示高球唔算係有錢人玩意，畀二千蚊就可以租場打十八個洞喎。
粉嶺高爾夫球場近日因為新界東北發展計劃人氣急升，唔少市民都想剷起塊地起樓，有會籍在手嘅立法會議員梁君彥（Andrew）尋日就發聲保衞球會，除咗質疑「係咪樣樣嘢都要起晒樓？」外，仲猛講風涼話，先係話自己平日打波唔使錢，又話高球唔係咩有錢人玩意，非會員平日攞二千元出嚟就可以租場打十八個洞。
梁君彥表示高球唔算係有錢人玩意，畀二千蚊就可以租場打十八個洞喎。
二千蚊打場波都唔係有錢人玩意，唔通係普通市民玩意咩？梁君彥知唔知呢筆數分分鐘係普通家庭半個月甚至一個月開支呀？據知，粉嶺高球場非會員要租場打波絕對唔容易。如果市民想好似佢咁得閒免費打番場波，淨係入會已經要盛惠二十萬元，根據行政會議成員申報紀錄，葉劉淑儀同林健鋒都申報有會籍。話時話，就算撻地唔起樓，都唔代表只係畀一小撮人去打波囉，開放畀市民散步夠好啦！
