政壇：麥齊光候發落頹搭叮叮
等候發落嘅麥齊光日前喺中環登上往東區方向嘅電車。
發展局前局長麥齊光因串謀詐騙政府嘅租金津貼，日前被裁定罪名成立，但獲准保釋，案件押後至下月八日聽取求情及判刑。聽候發落嘅麥齊光前日下午約四點半鐘，現身中環，好平民化咁一支公喺環球大廈外嘅電車站等搭「叮叮」，期間佢不時眉頭深鎖，雙目無神，向港島東方向嘅電車一到站，佢就依序上車，行上上層後就喺叮叮聲中慢慢離開中區。
等候發落嘅麥齊光日前喺中環登上往東區方向嘅電車。
麥齊光呢日一襲白色恤衫加深色西褲，孭住個深灰色背囊，可能係唔使趕時間，佢選擇嘅交通工具係電車，而站內其他人都似乎唔認得呢個前高官。一年前嘅麥齊光仲係新班子嘅一員，依家卻陷入手尾長嘅煩惱中，或者係咁佢等車時都情緒麻麻，貌似一臉愁容。
