政壇：政改諮詢 謝偉銓博一鋪
設計圖片及對白
隨着佔中議題升溫，圍繞本港政制改革嘅討論都愈來愈熾烈，雖然今次政改嘅焦點集中喺特首選舉上，但立法會選舉制度勢成無可迴避嘅一環，其中焦點議題更係功能界別存廢。民間對政府遲遲未有諮詢或方向性原則出台已經冇乜耐性，有啲界別更悄悄地行動起嚟，好似只係做咗一年議員嘅建築、測量及都市規劃界議員謝偉銓（Tony）就整咗個平台，供指定嘅專業界別人士探討吓功能界別存廢等政改問題。佢本身係來自功能界別嘅議員，今次取態咁勇研究功能界別存廢，唔驚心口碎大石，最終傷咗自己咩﹖
設計圖片及對白
議會新丁敢挑機
雖然係議會新丁，但唔代表Tony唔敢挑戰敏感話題，近月佢已經悄悄地成立咗個新平台，準備廣納界別內嘅建築師、規劃師、測量師等專業人士加入，呢個平台將會畀業內人士討論城中關注嘅政治議題，譬如畀會員喺唔同政治議題上表態，例如普選形式、功能界別存廢，甚至對佔領中環行動嘅睇法等。
泛民中人對功能界別好唔滿意，早就提議要廢除，但捍衞嘅聲音每每來自功能界別，依家Tony作為功能界別議員，竟然主動觸及呢個雷區，的確令人感到新鮮。佢解釋，政改問題冇得唔理，如果去到投票前一刻先諮詢業界就太遲，所以依家早啲搭定個平台，順便做吓民調研究都係好事。
Tony呢一招都算好策略，因為政府諮詢政改期間，經常話收集民意，但呢啲民意喺邊度嚟呢？好多時就係靠呢啲平台畀意見，而Tony一早搭定台幫班專業人士發聲，只要人數夠多，就可製造保留功能界別嘅聲音。如果係咁，心口碎大石可能又叫好又叫座喎！
