工廈劏房無錢分 關愛基金患不均
係人都知，香港有個「Ｎ無政府」，無能力、無民望、無誠信、無膊頭、無腰骨、無料到、無厘頭……咁「Ｎ無人士」又有乜特徵呢？嗱，如果你答無領綜援、無住公屋，只係啱咗一半o架咋，事關喺Ｎ無政府主政之下，Ｎ無人士已經又多兩個特徵，就係：無受關愛、無獲公平！
唔係咩？關愛基金通過發放「Ｎ無津貼」，向無物業同無攞綜援嘅非公屋住戶發放一次性租金津貼。話就話受助人定義放寬咗，劏房、板間房、寮屋同棚屋住戶都納入受惠範圍，偏偏工廈劏房戶就被摒諸門外，斗零津貼都無，咁樣對佢哋夠關愛咩？咁樣對佢哋算公平咩？
嗱，答案等工廈劏房住戶親身解答啦。話說社區組織協會日前帶立法會議員赴「劏」蹈「伙」，小小一個觀塘工廈天台之嘛，已經搭咗近三十間鐵皮屋，逼滿幾十伙劏房戶，其中有一家六口蝸居喺一個三百平方呎單位十二年，長期同老鼠曱甴做鄰居，有水喉電線做門檻，大熱天乾蒸，落雨天水浸，處境正一水深火熱。女戶主透露，自己打兩份清潔工，日捱夜捱都係得八千蚊人工，既要為癌症丈夫醫病，又要支付近三千元租金，生活擔子沉重。
Ｎ無津貼嘅正式名稱叫「居住環境惡劣的低收入人士津貼計劃」，大家難免要問一句，唔通咁嘅居住環境仲唔夠惡劣？唔通呢群被迫上天台嘅蟻民仲唔算低收入人士？如果官老爺堅持袖手旁觀，懶理工廈劏房戶困境，一係計劃改名，一係關愛基金收檔，因為你哋再無資格用關愛兩個字。
無錯，工廈劏房係違規單位，不過唔該搞清楚，關愛基金嘅宗旨係幫助有需要人士，唔係懲罰貧苦大眾囉。正所謂，不患寡而患不均，不患苦而患不公，大家都係劏房，都係貧無立錐之地，都係水深火熱，但係有人有津貼，有人無錢分，咁搞法，民怨唔爆發至奇啦。咪話太一叮唔提醒，蝸居工廈劏房嘅蟻民遲早多到滿山滿谷，政府都唔想下年七一遊行又破紀錄啩？
話時話，工廈劏房戶被「愛」理不理固然反映官僚不仁，其實就算私樓劏房戶獲發放津貼，亦唔代表有關愛o架。劏房又名港版貧民窟，居住環境惡劣，火警危機重重，政府如果真係關愛窮人，應該想方設法興建公屋，畀無殼蝸牛有個安樂窩，而唔係一味派津貼吊鹽水，咁做等如搵藉口延長劏房居民痛苦咋。講到尾，租金津貼最終只係益咗不斷加租嘅劏房業主，人稱「劏房波」嘅發展局局長陳茂波唔會唔知啩，叮！
