城中鏡：激瘦肥龍拍拖買西餅
許仕仁攞出一疊銀紙出嚟買西餅。
前政務司司長許仕仁（肥龍）捲入官司，佢兩公婆喺社交圈子絕迹，亦未試過喺街上撞到佢哋。上星期六佢兩公婆現身金鐘廊，面容輕鬆，不時有笑容，睇嚟佢哋已將官司嘅煩惱擺埋一邊。
許仕仁攞出一疊銀紙出嚟買西餅。
許仕仁（右）左手拎外套，右手抽住袋西餅。
睇許仕仁（左）嘅背影，瘦到衫褲明顯衣不稱身。
司機用舊凌志送許仕仁和許太歸家。
熱到爆仲拎外套
當日成三十幾度，許仕仁着住成套西裝不特止，仲拎住件厚身外套，真係睇見都覺得熱。佢同太太喺金鐘廊行過一間餅店，許太佇立餅櫃前，對住啲西餅指手畫腳，期間許仕仁笑得好開心，跟住喺衫袋掏出一疊銀紙，爽快買咗一小盒西餅。之後兩公婆施施然行去附近嘅力寶中心一間咖啡店。
當許仕仁入去買咖啡時，記者趁機上前同許太傾偈，許太大呻話屋企樓下經常有傳媒留守，兩公婆出街食飯都被人跟住，冇晒自由。講講吓，許仕仁買完咖啡出來，近距離見到佢更顯消瘦。佢自爆話舊年做咗通波仔手術，身體唔係咁好。心臟唔好仲食甜品？一向都愛美食嘅佢就笑笑口話見到啲西餅咁靚，忍唔住口，咪破戒買兩件返去慢慢歎囉！跟住兩公婆就落地下乘座駕離開。許仕仁單案排期至明年五月開審。
