有件新仔導演，拍咗段微電影，為博宣傳，特意將片中女角披頭散髮哭叫尋死的「扮自拍」片段，深夜放上網，叫人擔心，怕生命案，遂有不少好心網民報警救人；幾經調查，抓了涉事少女及該片導演返差館問話，事後，警方以「因屬誤會」放人，小導演承認事件上係有「疏忽」！

當被問到網上有人反感狠批他的「宣傳手段」，而呼籲抵制唔睇該片時，他表示不擔心，仲話：「每套電影都有人杯葛」，還說會繼續上載其他宣傳片！

小導演承認疏忽？上述造假片段是經過精心部署的：大前晚凌晨兩點，有把驚青男聲旁白，自稱在街上執到部iPhone，打算賣咗去，點知發現內有一段少女尋死短片，因擔心少女安危，於是放上網喎！

咁不擇手段、弄虛作假的劣行，不知錯還不知恥，如果讓佢過骨得逞，世界上仲使做好人嘅！所以，大家記住杯葛此片呀！

其實，這年輕人做出恬不知恥的所為，也不全是他的錯，佢都係「被害的一個」！看看今日香港（甚至整個中國大地），靠呃靠騙的成功人士活得多開心！

相反，踏實憂國為民者幾痛苦！而呢位小朋友處身的環境、接觸的事件，何其虛偽？電視台的「求愛」真人騷為求收視，唔核突醜陋都唔做。

蒙面網絡女歌手搞盡噱頭，一輪大龍鳳，扮愛港，博知名度，最終，原來係背後有經理人策劃，譁眾取寵，只不過想做搵錢快的「補習天后」！

大陸化的香港，道德淪亡，意識鄙俗，為求目的，已不顧廉恥了！我哋不能再讓劣幣驅逐良幣，否則香港仲會死快啲！遂遇到賤精，見一鑊，插一鑊！少不了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府