政壇：搞搞政：教協人才荒欲搵吳克儉借將
設計圖片及對白
自葉建源出任立法會教育界功能組別議員後，佢喺教協總幹事嘅工作已經由全職轉為義務兼任性質，實際工作就落喺已退休嘅教協理事陳洪身上。
設計圖片及對白
教協搵咁耐都搵唔到人做總幹事，歸根究柢係佢哋要求太高，但又出唔起高人工。公開招聘搵唔到合適人選，教協內部主要理事又唔想接呢個燙手山芋，加上陳洪表明最多只會頂兩年，之後就盡情享受退休生活。日子一日一日咁過，仲係搵唔到心儀嘅候選人，教協內部諗到頭都大埋。
教協會長馮偉華尋日話教協終於諗到點樣搵人做總幹事，就係問教育局借人。佢話教育局之前搵現職老師設計通識科教材時，試過用「停職留薪」呢招，直接畀錢學校請代課老師，等現職老師幫教育局設計課程嘅同時，又唔使驚無咗個教席。佢話教協可以照辦煮碗，請個老師或校長停薪留職去做總幹事，如果當事人做咗一陣覺得唔啱，都可以返去教書，但前提要得到教育局同學校同意。
如果教協開到聲問教育局局長「吳得掂」吳克儉要人，相信吳得掂一定耍手擰頭，事關教協喺唔少教育議題上都同政府對着幹，試問吳得掂又點會容許自己嘅教師掉轉槍頭攻擊自己呢？
