政壇：長情胡應湘心繫母校
胡應湘（左）對住佢間母校，同對太太郭秀萍（右）一樣咁長情。（資料圖片）
合和實業主席「哥頓」胡應湘年輕時曾赴美國普林斯頓大學，修讀土木工程學士，十多年前佢捐一億美金畀母校，成為一時佳話。日前喺一個活動上遇到哥頓同太太郭秀萍，哥頓太話上月佢哋去美國度假，但主要目的係陪老公出席校友會聚會。哥頓已畢咗業五十五年，依然心繫母校，認真長情。
胡應湘（左）對住佢間母校，同對太太郭秀萍（右）一樣咁長情。（資料圖片）
哥頓年近八十歲，但從未言退，佢話每隔五年就會返母校出席校友會活動。佢又話四年校園生活留畀佢唔少美好回憶，但最重要係佢好欣賞校方嘅宗旨。佢話當年唔係個個留學生都生活富裕，但只要係收咗嘅學生，生活點艱難都好，校方千方百計都會供學生讀書。
哥頓笑言雖然當年有爸爸做佢支大水喉，唔需要校方資助，但佢好欣賞該校有教無類嘅精神，仲話該校嘅畢業生，超過七成都會自動回饋母校。哥頓鼓勵時下年輕人飲水思源，關心母校發展。
