政壇：息金融糾紛方案多創意
由詹少弘出任行政總裁嘅金融糾紛調解中心，喺舊年接獲十六宗調解服務申請。（資料圖片）
投資者遇上金融糾紛，離唔開索賠，但剛成立一周年嘅金融糾紛調解中心，原來有啲個案嘅和解方案好具創意，唔係一定講錢o架！睇嚟佢哋嘅CEO詹少弘都喜出望外。
由詹少弘出任行政總裁嘅金融糾紛調解中心，喺舊年接獲十六宗調解服務申請。（資料圖片）
話說有個真實個案，有位葉小姐（化名）係銀行長期客仔，一直只鍾意投資債券。幾個月前佢發現買嘅金融產品原來唔係債券，而係一個無回報保證嘅保險產品。佢話銀行職員同佢講產品性質同債券相同，到期時有相等於本金6%回報。但到期日時回報卻少於6%，佢認為受職員誤導，要求銀行就承諾回報與實際回報間嘅差異作賠償。銀行就企硬話職員喺銷售過程已清楚解釋產品性質，絕冇誤導，葉小姐惟有向金融糾紛調解中心求助。
最後點收科呢？喺調解過程中，葉小姐透露自己係寵物愛好者，銀行代表於是提出一個非常有創意嘅和解方案，就係將數字23同8加進和解方案內，當以普通話發音時，就同「愛心pet」好相似。葉小姐覺得呢個和解方案好窩心，最後爭議圓滿解決。
