政壇：大輝反辣招謀出戰新東？
林大輝（右二）係前日唯一撐地產代理嘅立法會議員。
抗議政府推出連串壓抑樓市辣招嘅「辣招苦主大聯盟」前日遊行，大會話有成二萬三千人參加。參加呢個遊行嘅除咗一眾地產代理，仲有立法會議員林大輝。但大輝係工業界議員，照道理大纜都扯唔埋。之但係大聯盟嘅發言人何民傑係西貢區議員，莫非有意喺新界東直選嘅大輝已經開始發功？
林大輝（右二）係前日唯一撐地產代理嘅立法會議員。
「辣招苦主大聯盟」前日舉行遊行，大輝當日認真積極，唔止手持橫額行喺隊頭，仲行足成個遊行，唔知仲以為佢係地產界議員添！大輝之前都有提過想喺下屆立法會選舉轉直選，仲有機會出戰新界東。咁啱何民傑喺新界東又咁活躍，大輝咁落力難免會令人引起大輝想投桃報李嘅遐想。
我哋就問過何民傑，佢話佢向七十位立法會議員發出邀請信，邀請佢哋參加遊行聲援業界，點知得大輝一個回覆話會出席。佢同大輝只係喺立會公聽會碰過面，今次大輝竟然咁畀面行足全程，佢都好多謝大輝咁話。
大輝就話係因為受到地產代理嘅邀請先參加，仲話本港一向崇尚自由經濟，政府辣招帶嚟唔少副作用同後遺症，盞打爛香港金漆招牌喎！
