政壇：張華峰從政 賺少過百萬

美國退市未驚過

肥老闆話做議員後唔沾手股票，唔係擔心有利益衝突，而係太忙而無時間睇實個市，畢竟佢係第一年做議員，議會「新丁」要了解清楚議會環境，明白所有會議係搞乜東東，有乜會議要特別留意，所以咪冇時間囉！

佢舉個例，自己手上有一堆港交所（388），今年年初升成一成以上，最高位去到一百四十九蚊，如果淨賺呢一筆都夠晒和味。到底賺少咗幾多？夾埋有無唔見七位數字收入？佢就笑笑口話差唔多啦，但無真正埋單計數，所以唔肯定到底賺少幾多。

講起股市，肥老闆就大派貼士，話美國退市都唔使驚，因聯儲局退市正正係散戶入市訊號。原來佢玩捉心理，佢解釋指聯儲局唔係傻嘅，當然認為個市有上升趨勢先肯「收水」，所以退市後或有少少陣痛，但美國所有消費、出口數據都唔差，個市自然從低位慢慢反彈，所以佢先叫大家儲定子彈，一退市即刻撈平貨喎！言下之意，出口股將大有所為。

貼士就畀咗大家喇，到底肥老闆係股壇明燈，定係發放山埃毒藥，大家過多半年就知。