禍從天降,一架韓亞航空客機降落三藩市機場時墜毀,造成兩死百多人受傷。7月7日載住77名韓籍旅客嘅波音777客機遇難,係巧合定係「數字魔咒」作祟唔敢講,但有一件事毋庸置疑,就係航空安全生死攸關,稍有差池後果不堪設想。

好嘞,航機升降失控隨時會飛來橫禍,管理係咪應該慎而又慎,唔容許有任何錯漏風險呢?答案當然係啦。咁點解香港嘅航空交通管理系統仲會甩甩漏漏隱藏風險呢?又點解民航處仲魂遊太虛唔嗲唔吊呢?咁咪等如搵乘客安全較飛?

如果大家唔明太一叮講乜,不妨聽聽呢單更換空管系統計劃墜毀事件吖,真係令人有經歷九霄驚魂嘅心跳感覺o架。話說民航處○八年獲立法會撥款近廿億元,興建赤鱲角新總部大樓,並為新航空交通管制中心引入最先進空管系統,原本預計喺舊年雙雙投入服務。點不知,新總部今年初啟用,但係新空管系統就有得睇無得用,最新講法話最快明年下半年先至啟用喎。

有無搞錯呀?空管系統唔係急須更換至添置嘅咩?家陣一拖就延誤兩年,只係靠風燭殘年嘅舊系統頂檔,唔構成航空安全風險,都削弱航班升降效率啦。原來,新系統唔係唔可以用,而係唔敢用。嗱,有民航處前資深電子工程師爆料,印度新德里同孟買機場都係採用同款空管系統,過去三年至少發生五次故障,當處理大量數據時運作速度會減慢,嚴重時甚至會死機,系統穩定性備受質疑。

你話死唔死吖,五億五千萬元買番嚟新空管系統居然穩定性成疑,唔通乘客每次航班升降都要求主保佑咩!香港假假地係區內航空樞紐,平均唔使一分鐘就有一班航機起降,如果空管系統唔能夠盡善盡美,聽落都得人驚啦,香港人唔想見到空難發生呀!

唉,新空管系統淪為「空管」,空有系統而不管用。去街市買五十蚊嘢都要睇清睇楚啦,何況係五億幾納稅人血汗錢?民航處官僚盲舂舂,靠佢哋指揮航空安全,你話係咪夠晒驚嚇吖?

話時話,官老爺盲舂舂買錯貨都唔係新聞o架嘞。最盲丙嗰個叫消防處,最經典係斥資七千萬元購買十七部升降台消防車,新車居然隱藏射水無力問題,搞出一個「軟水不能救近火」嘅大笑話。香港作為一架飛機由呢班官僚領航,等如盲人帶路,真係隨時機毀人亡o架!

總之,小心駛得萬年機。民航處快快補番隻鑊確保空管系統萬無一失,你哋都唔想見到有隻飛機跌落街o架,叮!

第一手消息請下載on.cc東方互動iPhone/iPad/Android/Windows Phone Apps