當大家攤開一張香港政府架構表，見到司局長名單，自會明白何謂「垃圾圍城」。

這一年來，香港政府高層庸廢無能，一事無成之餘，仲做一鑊衰一鑊，恬不知恥，毫無檢討及反省的覺醒，還每每卸責怨政黨不配合、坊間不支持、傳媒不唱好……

呢棚由首日起已無誠信、亦不稱職的垃圾二打六，只靠近親繁殖的勾結，入主治港班子核心，香港唔PK才出奇。

唉！在政治大環境底下，那兩三個廢物堆填區，算得係乜嘢事吖？喺一個生成皇帝樣貌的環境局局長黃錦星手上，竟化成全港市民喊停、立法會議員（長毛）爆響口要拉布阻止，連建制派頭領劉皇發揚言退黨也要反對，呢個廢物局長，早就要收皮，委身入堆填區啦。

話黃錦星廢，怎也不及名震香江嘅劏房波威猛，生勾勾擘大眼講大話，喺新界東北新發展區計劃的方案裏，巧言令色，砌詞甚麼「加強版」，荒謬極致。人家好地地，本來就安居樂業的，你依家迫遷賠償畀人「加強」佢哋更安居樂業乎？另外，只強行徵收窮人農地，而不敢碰畀有錢人耍玩的高爾夫球場，還謊說收高球場有困難，又被人踢爆只須一年通知便可？仲有，又話政府做嘢有「保密制」嘅？點解，局方未宣布收購計劃，但那些計劃內的地區，會有人可得悉內幕，一早走去「落釘」，等着數？有無人出咗蠱惑呢？

尋日，睇《城市論壇》，見那個地政總署署長甯漢豪女士，態度囂爆，偽言官僚，呢啲是極速上位的官方材料，佢服侍貪曾時，甚得煲呔寵幸的！但呢類質素嘅垃圾官員管治香港，便是港人的悲哀囉！我哋要源頭減廢呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps