政壇：工聯暗抗劃區唔益建仔

話說政府最近分別到灣仔同東區區議會諮詢，喺東區劃走維園同天后兩區嘅方案，前者無風無浪得到一致通過，點知話口未完喺東區後欄失火，工聯會突然喺會上提出「十一區方案」，屆時灣仔同東區嘅議席均分，連同泛民區議員同個別獨立議員有合共十多人支持，即係三分一東區區會議員支持，搞到東區獨大嘅建仔都唔敢「霸王硬上弓」，最終建議發還當局再考慮議員意見。

一石二鳥增東區優勢

有資深地區人士分析，工聯會呢招認真係「一石二鳥」，因為一旦「十一區方案」成事，建仔同工聯會喺東區實力將大幅拉近，以目前東區區議員數目計算，前者會由十四人銳減至九人，後者則由七人減至六人，倘若第時工聯會再同泛民有合作協議或眉來眼去，話唔定第時有更多令人意想不到嘅情況喺東區發生。

至於喺「十一區方案」 下，工聯會唯一「被轉區」嘅立法會及區議會「雙料議員」郭偉強，其實亦身負重任，皆因佢嘅和富選區一旦轉咗去灣仔，將可為工聯會喺灣仔取得近年「零的突破」，更甚係可為工聯會喺港島實力進一步擴展做定前期準備工作。

事實上，建仔同工聯會新仇舊恨一堆堆，先係有舊年九月立法會選舉搶票、拉票傳聞不絕，其後建仔鍾樹根當選立法會議員後，今年年初辭去東區區議會主席一職，縱使工聯會多番爭取想分一杯羹，但係建仔依然要霸晒區議會正副主席，所以有人對於工聯會今次嘅突襲示威行為，一啲都唔感到意外喎！